पुणे : इंडियन मेडिकल असोसिएशनच्या वतीने सह्याद्री हॉस्पिटल्सच्या सहकार्याने ‘देह व अवयवदान जागृती’ या विषयावर एका विशेष कार्यक्रमाचे आयोजन करण्यात आले होते. या कार्यक्रमात ५० नागरिकांनी अवयवदानाची प्रतिज्ञा केली. अभिनेत्री पल्लवी पाटील, सह्याद्री हॉस्पिटल्सच्या डॉ. शीतल महाजनी, ‘आयएमए, पुणे’चे अध्यक्ष डॉ. संजय पाटील या वेळी उपस्थित होते.
डॉ. शीतल महाजनी यांनी यकृतारोपण शस्त्रक्रियेची उपयुक्तता, रुग्णांची निवड, कार्यपद्धती याचे विवेचन केले. ‘आयएमए’च्या अवयवदान समितीचे अध्यक्ष डॉ. अरुण हळबे यांनी देह व अवयवदानाची संपूर्ण माहिती दिली, तसेच डॉ. वैशाली भारंबे यांनीही देहदानाविषयी सखोल माहिती दिली. देह व अवयवदान महासंघ, मुंबई, नाशिकचे प्रकल्प समन्वयक सुनील देशपांडे यांनी पदयात्रेतून अवयवदान प्रचार व त्याची उपयुक्तता सांगितली. ग्रामीण भागातील कार्याचीही माहिती दिली. फॅमिली फिजिशियन डॉ. विनय कोपरकर यांनी स्वतःच्या यकृतारोपण शस्त्रक्रियेचा अनुभव सांगितला.
‘आयएमए’चे मानद सचिव डॉ. राजन संचेती यांनी कार्यक्रमाचे सूत्रसंचालन केले.
